1 Samuel 13

Iatu Saul pirang-pirang taunmo tonna randuk ma’parenta. Iatonna duang taunmo umparenta to Israel,

napileiammi Saul kalena tallungsa’bu tau dio mai to Israel; duangsa’bu tu sola Saul dio Mikhmas sia dao buntu Betel na sangsa’bu sola Yonatan dio Gibea lan lili’ Benyamin; na iatu senga’na nasua sule lako tendana.

Nataloimi Yonatan tu surodadu pa’kampana to Filistin dio Geba; narangimi to Filistin tu mintu’ apa iato. Attu iato napesuammi Saul umpannoni napiri tanduk dio lu mintu’ lili’ tondok, nakua: La narangi mintu’ to Ibrani.

Narangimi mintu’ to Israel tu kareba iato anna ma’kada, nakua: Natalomo Saul tu surodadu pa’kampana to Filistin; iamo napobannang anna kadake lele tu to Israel lako to Filistin. Undinnato sirampunmi tu to buda unturu’ Saul lako Gilgal.

Iatu mintu’ to Filistin sirampunmo la sirari to Israel; iatu kareta pararinna den tallungsa’bu anna iatu pakkanarangna annan sa’bunna na iatu lumingkanna susito karangan dio biring tasik. Ke’de’mi tu tau iato mai sola nasang, anna pabendan tendana dio Mikhmas rampe matallona Bet-Awen.

Iatonna tiromi to Israel lan kamasussan sia kapussakammo tu to buda, membunimi tu to buda lan lu lo’ko’ sia lan lu sapak batu sia dao lu buntu batu sia diong lu garuang sia diong lu bubun marangke.

Den duka pira to Ibrani ullamban Yordan, anna male lako Gad sia Gilead, tonna torropa tu Saul dio Gilgal; iatu mintu’ to umbumbunni tu boko’na mataku’ sia ma’parondo.

Ma’peagi-agi tu Saul pitung allo susitu attu naallu’ Samuel, apa iatona tae’ narampo tu Samuel lako Gilgal, sisarak-sarakmi tu to buda dio mai kalena.

Iamoto nama’kada tu Saul, nakua: Banna’ mai tu pemala’ ditunu pu’pu’ sia pemala’ kasalamaran. Napemalarammi tu pemala’ ditunu pu’pu’.

Mane mangka napemalaran tu pemala’ ditunu pu’pu’, ta’kala saemi tu Samuel. Sunmi tu Saul untammui, la ussalama’i.

Ma’kadami Samuel nakua: Apara mipogau’? Mebalimi tu Saul nakua: Belanna kutiro tu to buda mallai sisarak-sarak dio mai kaleku sia tae’ duka misae lan to allo diallu’, sia sirampunmo tu to Filistin dio Mikhmas,

kutangnga’mi lan penaangku, kukua: Sattu’mora nasaemo to Filistin ullaoina’ dio Gilgal, natae’pa kupalakui lako PUANG, kumua anNa bura’moraki’ lindo masakke, iamoto angku pabarani tu kaleku umpemalaranni tu pemala’ ditunu pu’pu’.

Ma’kadami tu Samuel lako Saul, nakua: Iate penggaurammi te kabagan tongan, belanna tae’ mituru’i tu pepasanNa PUANG, Kapenombammi, tu dipokadangkomi, belanna iatu tanan penaanNa PUANG, la morai umpatontongi totemo tu kadatuammi lako to Israel sae lakona.

Apa totemo iatu kadatuammi tae’ nala masae lako. Mangkamo Nadakaran PUANG Kalena tu misa’ to naala penaanNa, sia tau iato la Naangka’ PUANG dadi arungna mintu’ taunNa, belanna tae’ midampangi tu pepasanNa PUANG lako kalemi.

Mangkato ke’de’mi tu Samuel dio mai Gilgal ma’palurekke Gibea lan lili’ Benyamin. Nabilangmi Saul tu mintu’ to torro siapa sola, denpa agi-agi annan ratu’.

Torromi tu Saul na Yonatan, anakna sia mintu’ tu to torro sola dio Geba lan lili’ Benyamin, apa iatu mintu’ to Filistin ma’tenda dio Mikhmas.

Tassu’mi lan mai to’ tenda to Filistin sangbaanan surodadu mangrampa dipatallung tuntunan, iatu sangtuntunan unnolai lalan lako Ofra, ma’palulako lili’na Syual.

Iatu sangtuntunan unolai lalan lako Bet-Horon na iatu sangtuntunanna pole’o unnolai lalan ma’palulako lili’ tondok, tu daona lu lombok Zeboim, ma’palulako padang pangallaran.

Moi misa’ pande bassi tae’ bangmo lan lu mintu’ tondok to Israel, belanna nakua to Filistin: Da anna garagan pa’dang ba’tu doke kalena tu to Ibrani.

Iamoto manassa inang mengkalao tu mintu’ to Israel rokko to Filistin, kumua anna pantan unnasa sae’na sia mata tengkona, uasena, sia rangkapanna.

Iatu sarona mangasa sae’ sia mata tengko duang kanna sikele’ na iatu sarona mangasa bingkung sia uase sia umpemanda’i bassi matadi’ dio tampak pebamba sangkanna sikele’.

Iamo bannangna to na iatonna attu kasirarian moi misa’ la’bo’ ba’tu doke tae’ lan limanna tu mintu’ tau nasolan Saul sia Yonatan, sangadinna dio manna Saul sia Yonatan, anakna tu nanii.

Ta’kala sunmi sangtuntunan surodadu pa’kampa to Filistin, anna male lako aa’ Mikhmas.